ساعة حمد

الحمد لله ربنا هداني ولم أستسلم لموجة الاكتئاب واليأس الماضية فانتحر
ربنا كريم لقيت حد بيحبني...... ويموت فيا......... وشايف أني قمر
أي نعم هو لم يتجاوز الثالثة لكن الأمر مفرح لأكثر من سبب
ربنا كريم... والصغير مع قليل من الصبر يكبر ومن شب على شيء شاب عليه... فلن أخشى أن تتغير مشاعره مع الأيام فيكون ساعة حنون وساعة مجنون
ربنا كريم وقادر كما ألقى محبتي في قلب هذا الصغير أن يرزعها ويزرعها في قلب أكبر قليلا وإن كان أقل خصوبة وأكثر ازدحما
علينا تقدير الإيجابيات...... واعتبار محبة الصغير بشرى بأن لا شيء مستحيل..... والصبر طيب لكن بني آدم جهول وعجول..... عجول هنا تعني متسرع وقد تكون مؤشر لطريقة تفكير فاشلة عندما تستخدم الكلمة في صيغة الجمع
حلم الجعان عيش ولن يتأمر ويتبطر إن كان رغيف كامل أو فتافيت أو أسمر أو حتى عيش سن.... المهم نلاقي حد مبتسم في وشنا متهللا لمجيئنا
ولنكن واقعيين فنساعد أنفسنا قليلا للحصول على الحب
شكولاته ينفع ..... لبان ما يضرش...... فتح عينك مش تاكل ملبن بل ممكن تلاقي حد يحبك
النقطة العويصة في الموضوع أن ابن الثالثة طلباته واضحة الدور بقى على الأكبر
لا أعرف إن كان يحب الشكولاته ولا اللبان
قد يقول البعض أنه حب غير حقيقي ولا عاقل فأدافع عن حبي فأقول أني أفضل القليل المتصل على الكثير المنقطع....كما لا حاجة للعقل من أساسه الذي يتحايل على شرع الله فيحل حراما( دون تفصيل) ويحرم حلالا

أديني أفضت عليكم من خبراتي اختار وأعد أدواتك يا شوكلاته يا لبان

ربنا كريم والحمد لله

تاااااااج عليه دية

انت مين ؟؟

واحدة غلبانة لكن مخرمشة

مين أكثر ست اشخاص بتحبهم؟؟

أنتم متفائلون إني بحب حد من أساسه ضحكتوني هههههههه
عموما أنا بحب أي عيل في السكة، وكل متفائل في الحياة، وكل مثابر، أي حد يعرف يضحك ويضحك الناس،
هل أنت سعيد؟؟
هجاوب بس أعرف الأول سعيد يعني إيه!!.... آآآآه بجد هي معناها كده مكنتش أعرف قبل النهاردة
مممم
لا ......أنا غير سعيد.... ليه؟؟ أصل... ممم ....أصل ممم
أنا مؤنث وبالتالي سعيدة الحمد لله بنسبة 80 في المية رضا وكل ما ساعاتي بتمر مش هتصدقوا لكن والله أني أزداد سعادة ورضا
لو اجتمعت مع حسني مبارك في مكان واحد هتعمل إيه؟؟
هأعمل نفسي مش عارفاه ههههه ما أنتو عارفين بقى الثقل صنعة بحاول اتعلمها وفرصة أطبق
لو معايا مليون ونص أعمل بيهم إيه؟؟؟

عدم المؤاخذة في السؤال بأي عملة أصل نوع العملة يفرق في قوتها وفاعليتها وعشان رياح التفاؤل نخليها من أغلى العملات اليومين دول وأقول أنفذ حلم حياتي وأعمل ملجأ للأيتام ومنجرة لأني بحب الخشب جدا منها صنعة في إيد العيال ومنها تصرف على الدار بعد ما أموت والمليون يخلص.
بتحب مصر؟؟

فوق ما تتخيلوا ونفسي هيا كمان تحبني .. ثم يعني حب الأوطان من الإيمان
هل أنت مسلم؟؟

الحقيقة هي دي أحلى حاجة في حياتي الحمد لله على نعمة الإسلام ونعمة الهداية للدين عموما
ليه؟؟
محدش قالكوا قبل كده إن كلمة ليه مش لاقية جواب!!
في البداية عشان طلعت لقيت أهلي مسلمين لكن لما فهمت حتة حبيت ربنا ورحمته وأكثر ما أحس هذه الرحمة في دعوته لنا لندعوه ليستجيب لنابحبه لعظمته فأمره كن فيكون ولولا حبة الدين اللي كرمني بيهم ربنا كان زماني في حتة من اثنين يا العباسية يا بيت خالتي

مين أكثر شخصية متقدرش تستغني عنها؟؟؟

طب وليه الاحراج ده يا جدعان؟؟ المفروض يعني أننا صحاب.... أي حد أحبه مقدرش استغني عنه

إيه أكثر موقف محرج؟؟
سألتني واحدة يوم فرح أختي شكلك كده فرحانة يا ترى الفرحة دي بجد؟؟؟ قلت طبعا وليه لاء!!! معقولة فرحانة أختك الصغيرة بتتجوز قبلك؟؟ قلت عادي- أساسا الموضوع مكانش فدماغي في تلك الحقبة الزمنية- أصرت بغلاسة نادرة طب ليه اختاروا اختك مش أنت؟؟؟ طب دي يترد عليها ازاي؟؟ بصراحة لما بغضب ببقى وحشة جدا .... واختصارا لمرار ثلاث شهور من التعامل الإلزامي مع الشخصية الغلسة دي قررت تزورنا وابنها كماننا اللي كان بيدرس طب في ألمانيا عدت أول زيارة على مضض طبعا تحت ضغط كل مصادر السلطة في العائلة الكريمة قابلته ثاني مع والدته ووالدتي وقال اتكلموا مع بعض... لقيت الواد مزورق يا حبة عيني والدمعة هتفر من عينه مالك يا أخي- على اعتبار المسلم أخو المسلم- قالي مش عارف الارتباط في الوقت ده هيعطل خططي ومش عارف لو كنت هقدر التزم بالموعد وكنت عايز اشتغل شوية بس ماما مش موافقة وعايزة اول ما اخلص ارجع على طول....... دكتور ومغصوب يا جدعان طب أنا اعمل إيه دلوقتي مش كفاية عليا عمايل أمي استحمل كمان عمايل أمه... ما علينا قلت بصراحة بعض الأمور محددة بوقت مثل دراستك ولو نفسك تشتغل في الغربة شوية تكوم نفسك برضو هيكون أسهل لو انت مش مرتبط والجواز مش هيطير فخليك مركز في المهم...هب هب هب لقيت اللي بتصرخ وبتقولي حسبي الله فيك ونعم الوكيل طبعا والدته... مش هقولكم على منظري ومنظر والدتي في بيتنا الست بتدعي عليا يخرب بيتك أنا جبته عشان تقنعيه يرجع مش تقولي خد فرصتك ثم أنت مالك بحياة أبني هنا كان يا جدعان لا بد من وقفة قلت انت مش شايفة انك تجاوزت حدودك بتدعي عليا في بيتنا الحقيقة كان موقف زبالة الزبالة اهلي اتريقوا عليه بتاع خمس سنين قال إيه بقوم الواد على أمه... كانت ساعات وأيام غبرة إيه يا جدعان محدش بيعنس كده بالساهل

الامنية اللى اتمنا تحقيقها ؟؟

الحقيقة فيه أكثر من أمنية لكن الثابتة بينهم دائما أن لا أمرض وأموت بصحتي على طاعة مش عارفة هأموت ازاي بصحتي!!! محدش يسألني لكن دعواتكم

التاج باه يتمرر لمين؟؟؟؟
التاجات فيها معلومات شخصية واحتراما لخصوصية أخواني البلوجرية مش هأدبس حد لكن سأطلب من كل لطيف وأمورة بيشروفني بزيارة أنهم يجاوبوا عليه ويدونا ألو عشان نتعرف عليهم أكثر ويرحموا فضولنا .
ملحوظة: اتبسطت يا ما علينا اديني جاوبت قال دية قال وإيه كاش كمان...

ساعة هرتلة

ولأن البشرية عمالة تستغيث وتستجير من اكتئابي وبسبب تأخر الإذن حاولت تسلية نفسي والخروج من بئر الاكتئاب وإليكم ما كان

............

وجدت سؤال على موقع ما هل تعرف برجك الصيني؟ والإجابة طبعا لا وفكرت باكتئابية وضبابية لربما كان السر في الصين

والصينين في أيامنا هذه يكتسحون الحياة بما فيها فوانيس رمضان وحد ابن حلال كان قالي ناوين يغرقوا السوق عرايس صيني

فكرت أن لا بأس أشوف بختي الصيني ولأن ما قرأته أضحكني أحببت أن أشارككم بسمتي ويلا نغير جو

على فكرة حاجات كثيرة من اللي قالوها كانت صح فقلت اتركها واشير لها كمحاولة مني لتقديم بعض المعلومات التي تطلبها التاجات من شجرة الدر ومن ما علينا لعلهم يهتدون إلى من تحمل السكينة بجر السين اليومين دول فقط
من الأول كده برجي الأفعى
محدش يضحك دا انا حمدت ربنا اني مطلعتش خنزير مثلا
أما شخصية الحية يا اعزائي
الحية لطالما رمزت إلى غواية الإنسان. في الحقيقة هي مولودة بجاذبية وشعبية فطرية لأبعد الحدود. أن تكون مركز الاهتمام والتقدير هو أقل ما يمكن أن تنتظره. وبالرغم من ذلك فهي شخصية هادئة وقليلة الكلام. وتمتاز بالأخلاق العالية. لا يمكن أن يثنيها شيء عن عزمها إذا قررت المضي بأمر ما، وتصارع من أجله حتى النهاية. كثير من الأشخاص يقعون في حبها، وقد يكون ذلك دون أمل أو بشكل سري

تعتمد الحيات في حكمها على الانطباع الأول؛ لأن لديهم حاسة سادسة قوية
نقاط القوّة
الحية موهوبة، ذكية، منظمة، رومانسية، ساحرة، ّذات إرادة عقلية فذة. تحب المال ومتع الحياة. مفكرة, فيلسوفة، شخصية معروفة، ولا تهدر الوقت فيما لا يجدي.
نقاط الضّعف

أنتو عارفين طبعا ومتأكدين أن معنديش نقاط ضعف أنا أساسا كل حديد وقوة
الحية غامضة , لا تنسى الإساءة، وتنتظر سنوات حتى يحين موعد الانتقام. صعبة المراس، قلقة، تكره الخسارة، ولا تصغي لنصائح الغير


أثناء بحثي عن صورة للموضوع افتكرت فجأة حبي وأنا صغيرة للثعابين في أي جنينة حيوانات وخواتي يقرفوا مني ومحدش يقف معايا وأنا اتفرج عليها يكلموا اللفة ويرجعوا وأنا واقفة مبهورة أمام صندوقها الزجاجي.... احتمال الصينين يعرفوا عني حاجات كانت غايبة عني في الأساس أفعى اللهم احفظنا

أفعى دي كانت شتيمة على زماني ولكنها بالصيني شخصية

فعلا يا جماعة اللي معندوش أمل عند العرب عليه بالصينين
J
حلوة الحدوتة ولا ملتوتة

في انتظار الاذن

لا يجوز نكش المكتئبين حراااام مساكين... وممكن نشوف أي كبير ومهم يفتيها يعني مش حكاية
بعد فشل محاولات انعاش المكتئب تقدم الموقع أدناه وأعلاه وفي خلقة جميع من صبحه ومساه بطلب بكاء رسمي للمرصد الجوي وما زال في انتظار الإذن
وفي حال السماح ستنهمر الدموع أنهارا وتلحق الضرر بكيانات واعتبارات أشرارا وأخيارا ....وتبقى المخدة بلا شك الكيان الأكثر تضررا بلا جدال وفي كل الأحوال تحتاج المخدة بعد كل اعصار لزمن كي تجف
الدموع المنهمرة ستغرق النجاح والفشل ففي الأعاصير تتساوى الأمور
يؤدي انهمار الدموع لتعطل معظم الوصلات الكهربائية والمجاملات الاجتماعية والمتع الملونة والعادية
ونتيجة لكثرة شكاوى المتضررين لشركات التأمين تحاول الأخيرة الضغط على مصادر القرار كي تمنع الإنهمار وأثناء الانتظار يسود المنطقة حالة من الاكفهرار من غائم إلى غائم جزئيا
وعلى فكرة من زمان وأنا نفسي أبقى مذيعة نشرة جوية
وعيشني ثواني وياك من ثاني .....اكتئابي حبيبي واحشني مووت

ملحوظة: محاولة للمقاومة لتأخر الإذن حاولنا تعلم فن السرور

ساعة تدريس 1

مش أنت مدرسة علميني
!!!
أي نعم مدرسة لكن ناوية اعتزل
وغاوية وناوية أمتهن حاجة فيها مزيد من التدليس
من فضلك ممكن أكون آخر تلميذ في الفصل عندك
وعشان مش بحب الزن والزانين إلا نادرا وفي بعض المواضيع المحددة أجبت
استعد للدرس الأول وبطل زن
أمسك الورقة بشكل مقلوب ونظر فيها
الهدف الأول تعرف فين بداية الصفحة.... عادة تكون بداية الصفحة سطر قصير في الوسط أقصر من باقي الأسطر
اسمه العنوان إلا إن كنت تقرأ حاجة عربي فالعنوان ممكن ياخد ثلاث أربع سطور أطول من غيرهم لكن برضو في الوسط أصل العرب يموتوا في الدقة والأمانة العلمية والحرفنة المهنية
هو يدندن عنوان بيتنا زي ما كان بس انت نسيت العنوان ابعت واسأل وبلاش تتقل أحسن ناخد على النسيان
شايف الحاجات السودا الصغيرة والمرصوصة جنب بعض؟ دي بقى اسمها الكلمات
يدندن أغنية ماجدة الرومي يسمعني حين يراقصني كلمات ليست كالكلمات... اسم الله عليك هي دي الكلمات الي كانت بتسمعها أنت دلوقتي هتقرأها
هو يدندن أنا اعتزلت الغرااام من يوم اللي حبك شيبني
اللهم طولك يا روح
الكلمات أشكال ليس لها معاني
الكلمات أدوات تستخدمها الناس عشان تقول الحقيقة ساعات وساعاااااااات تقول فيها حاجات ومحتاجات
ونلفت انتباه المتعلم للمتشابهات
حسي وإحساسي كلمات متشابهة الأولى تعني صوتي والثانية مشاعري
طالبان وطلبان الأولى لو سمعتها في الفصل يعني أنت وزميلك الثانية لو سمعتها في الأخبار تبقى جماعة ارهابية حسب القوانين الدولية
ديك النهار... أنت عارف الفرخة مش كده؟ ده بقى جوزها كل يوم الصبح يطلع شغله وقد تعني ذاك اليوم
*****
التدريس مهنة قاتلة وسامعة كل الناس الي بتقول أنه مهنة الرسل
كلامكم خد من عمري سنين
المدرس عامل زي الثور المربوط
محصور جوه دور مقصور
تلف تلف وأنت مكانك بتدور
لا بره محترم ولا جوه مشكور
!!!!
جوه الدور محصور وعمرك ما هتشوف النور
تعيش مغمور وتموت مقهور
!!!!!
نفتح صفحة الوفيات ندور على وظائف شاغرة وعشانا عليك يا رب

ساعة غداء

وصلتني دعوة لغداء عمل
:)
الكلام بجد والغدا جد جدا
ويبدو أني مضطرة للذهاب هذا العام وكفاية السنين اللي طنشتها
محتاجة حجة قوية عشان أغيب أصلي مش عايزة أروح ولو الغدا ببلاش
شوفوا
غداء عمل يعني أشوف نفس الناس الغلسة اللي وشي في وشها كل يوم في الشغل واللي أنا عرفاها وطالعة عيني منها يعني بناقص ساعة زيادة أتملى فيهم ولا إيه
غداء عمل يعني تعمل فيها شيك وكلاس وتقلب في الأكل بس .... آه بجد وكثيره لقمة أو اثنين عشان ميبانش أنك مفجوع أو مفروس من طريقة أكلك
في غداء العمل مفروض نتلهي على عينا وما نبصش للناس إلى فوق نبص بس في طبقنا وهما يكروتوا كل الأوامر والطلبات إلي زي وشهم وعايزة أكثر من مشروبات غازية عشان تتبلع
وانتو طبعا عارفين عيب نتكلم والأكل في بقنا ... طب ينفع أتفه في وشهم وأتكلم
غداء عمل على غرار مبدأ جدتي اطعم الفم تستحي العين
أنا عايزة محفزات عشان أروح غداء العمل
رقاصة...... ومطرب شعبي....... وقرداتي
:)
لو حد من اللي عارفني يشوف الكلام ده هيعرف أني سلمت أخر حتة من عقلي
يا إما كنت بهلس عليهم في كل ساعاتي اللي فاتوا
الحلو هيقول رقاصة يا مفترية وعلى غداء عمل.... طب أعمل إيه أنا بنام بدري ومش بتعشى
وعشان خاطر التواضع في الطلبات ممكن أتخلى عن الرقاصة
وعشان خاطر الناس الحلوة ممكن أعتبر المدير هو المطرب الشعبي
لكن لا وألف لا لن أتخلى عن القرداتي
عايزة حاجة تطري على مراوحي مش ممكن كده يا جماعة
وسلامي الحار إلى كل مزنوق في غداء عمل وكل غداء عمل وأنتو طيبين وعنه بعيدين

ساعة ظن

كنت أظن الريح جابت عطرك يسلم علي
كنت أظن الشوق جابك تجلس بجنبي شوي
كنت أظن .. وكنت أظن.. و... خاااااب ظني
!!!!!
معلش ما تزعلش
أيظن؟؟ أيظن؟؟ تري تري
اسم فيلم كان نازل من مدة وغالبا مش هشوفوه لكن دعايته تحاصرني والأولى كلمات أغنية محمد عبده الأماكن كلها مشتاقة لك
أنا أيضا كنت أظن
هناك نفي صريح عن الظن وضرورة الإعتماد التام على الحقائق
!!!
طب أعمل إيه؟؟؟؟ مهو أنا لو لاقية حقائق أو حتى بيانات مش هأظن
العالم يرقص اعزائي ويتراقص والرؤية غير واضحة ولا أسهل من تغيير مسميات الأشياء وزي ما بيقول المثل " عنزة ولو طارت" فرغم الحقيقة القديمة القائلة بعدم مقدرة المعيز على الطيران تجد من يحاول إقناعك بإمكانية ذلك
العادي أن المعيز لا تطير لكن معزتهم سبحان العاطي الوهاب بقى يا أخي خارقة وقادرة على الطيران
!!!!
في هذه الساعة خياراتك محدودة..... يا إما تتخانق وتقول بالفم المليان لاءه بقى..... لو طارت تبقى مش معزة اساسا أو تعك الدنيا وتظن في بعض المسلمات وتقول احتمال برضو!!!! وأدام المعيز أصبحت قادرة على الطيران أظن أنا بقى براحتي أن الصداقة قد تكون الشيء الوحيد بين رجل وأمرأة!!! وكنت أظن الخير ينتصر دائما!!! كنت أظن الطيبين أكثر سعادة!!!! كنت أظن الناس حلوين!!! كنت أظن أني واضحة جدا ولن أدخل دائرة الظن
باختصار اكتشفت إن حالي من حال محمد عبده كنت أظن وكنت أظن وخاااااب ظني في حاجات كثير وناس أكثر
أنتو بقى ما ساعات الظن عندكم
؟؟؟؟
وعشان نفتح اللون الغامق نقول إيه الساعات التي لم يخب فيها ظنكم