مش أنت مدرسة علميني
!!!
أي نعم مدرسة لكن ناوية اعتزل
وغاوية وناوية أمتهن حاجة فيها مزيد من التدليس
من فضلك ممكن أكون آخر تلميذ في الفصل عندك
وعشان مش بحب الزن والزانين إلا نادرا وفي بعض المواضيع المحددة أجبت
استعد للدرس الأول وبطل زن
أمسك الورقة بشكل مقلوب ونظر فيها
الهدف الأول تعرف فين بداية الصفحة.... عادة تكون بداية الصفحة سطر قصير في الوسط أقصر من باقي الأسطر
اسمه العنوان إلا إن كنت تقرأ حاجة عربي فالعنوان ممكن ياخد ثلاث أربع سطور أطول من غيرهم لكن برضو في الوسط أصل العرب يموتوا في الدقة والأمانة العلمية والحرفنة المهنية
هو يدندن عنوان بيتنا زي ما كان بس انت نسيت العنوان ابعت واسأل وبلاش تتقل أحسن ناخد على النسيان
شايف الحاجات السودا الصغيرة والمرصوصة جنب بعض؟ دي بقى اسمها الكلمات
يدندن أغنية ماجدة الرومي يسمعني حين يراقصني كلمات ليست كالكلمات... اسم الله عليك هي دي الكلمات الي كانت بتسمعها أنت دلوقتي هتقرأها
هو يدندن أنا اعتزلت الغرااام من يوم اللي حبك شيبني
اللهم طولك يا روح
الكلمات أشكال ليس لها معاني
الكلمات أدوات تستخدمها الناس عشان تقول الحقيقة ساعات وساعاااااااات تقول فيها حاجات ومحتاجات
ونلفت انتباه المتعلم للمتشابهات
حسي وإحساسي كلمات متشابهة الأولى تعني صوتي والثانية مشاعري
طالبان وطلبان الأولى لو سمعتها في الفصل يعني أنت وزميلك الثانية لو سمعتها في الأخبار تبقى جماعة ارهابية حسب القوانين الدولية
ديك النهار... أنت عارف الفرخة مش كده؟ ده بقى جوزها كل يوم الصبح يطلع شغله وقد تعني ذاك اليوم
*****
التدريس مهنة قاتلة وسامعة كل الناس الي بتقول أنه مهنة الرسل
كلامكم خد من عمري سنين
المدرس عامل زي الثور المربوط
محصور جوه دور مقصور
تلف تلف وأنت مكانك بتدور
لا بره محترم ولا جوه مشكور
!!!!
جوه الدور محصور وعمرك ما هتشوف النور
تعيش مغمور وتموت مقهور
!!!!!
نفتح صفحة الوفيات ندور على وظائف شاغرة وعشانا عليك يا رب
15 comments:
اولا انا عايز اشكرك على مرورك عندي و تانيا ان معرفتش ارد عليكي عندي في المدونه بصراحه الناس فهمت كلامي غلط و انا يا جميل ناس كتير استحمرتني عادي يعني مفهاش حاجه بس حبيت اقولك شكرا و البوست بتاعك جميل اوي و ليه تعليق تاني عليه
السلام عليكم
لما دخلت مدونتك حسيت انى لسه فى مدونتى
وبعد كده لقيتك بتتكلمى عن الكلمات برضه ..
قلت لاء دا كده كتير ..
حضورك مدونتى جعلنى اعجز عن قول الكلمات ..
وبيقولوا .. ان اقصى معانى التعبير هو ان تعجز عن التعبير ..
تحياتى
فعلا المدرس مهنة منسية جدا بالرغم من ان فيه مدرسين كتير بيعلموا مع الواحد و عمرنا مهننساهم
عليكى حبة مواضيع فعلا تجيب سكينة
البوست حلو جدا فكرنى بذكريات المدرسة االى بتدمع عينى لما افتكر المدرسات بتوعى الى ادونى سنين طويلة و كانوا مثال لعطاء المشكلة ان الواحد مش عارف يديهم حقهم بس اكيد ثوابهم عند ربنا
سلام ...
انتي كلامك على الوجع ، انا باحب التدريس جدا جدا وباشعر انه بيخلصني من كل الطاقه السلبية وباعبر فيه عن نفسي
باعمل كل شيء من الشرح والصراخ والتكرار والتنكيت ، المشكله اني ما اكتشفتش حبي للتدريس الا لما تركته ، مش مهم انه المدرس لا يتطور ويدور في الساقيه زي ما بتقولي لما بيلاقي انه ساهم في تطور مخلوقات اخرى وهم الطلبه . البوست حلو جدا . تهانينا
السلام عليكم
ات التدريس اذا لك يكن بحب واحاطة سور الروتين و نزع من الابداع وان تكون الاشكال هى الاشكال والكلام هو الكلام والتكرار هو التكرار
يبقى ربنا يعينك علية بجد صعب جدا الخروج من هذا الاطار الا من رحم
هو اصلا التدريس ده مهنة مملة ومرهقة قوى
ربنا يكون فى عونك
هوا لية فى حد بيشتغل مدرس؟؟
اعذرينى؟
فى بجد
يعنى بيخشو الجامعة
الى هيا لية تربية دى وبيطلعو مدرسين وكدة
يا سبحان الله
عجبنى اوى الاخير دة
----------------------------
التدريس مهنة قاتلة وسامعة كل الناس الي بتقول أنه مهنة الرسل
كلامكم خد من عمري سنين
المدرس عامل زي الثور المربوط
محصور جوه دور مقصور
تلف تلف وأنت مكانك بتدور
لا بره محترم ولا جوه مشكور
000000000000000000000000000
فعلا يا افندم
هيا مهنة الانبياء لان الانبياء مشافوش يوم راحة سعادتك
بس كدة
انتظار مؤقت
ما زلنا في انتظار تعليقك على البوست والظاهر إن اختيارك لاسم الانتظار لم يكن صدفة
:)
ما زلت أشك أن حد يقدر يستحمرك طب فكر ثاني أثناء انتظارك
ياسر سليم
وعليكم السلام ورحمة الله
أهلا بك نتشابه في اختيارنا لألوان الصفحة واهتمامنا بالكلمات ولا غرابة في هذا فالمؤمنون أخوة ونحسبنا كذلك إن شاء الله
تحياتي ودعائي بالتوفيق لك في مدونتك
ma-3alina
منوراني
نشكر لك كلماتك في حق المدرسين المساكين ولا يتخيل الكثيرون الضغط النفسي الذي يسببه التدريس لكن للحق يبقى المتعلمون أحلى حاجة في الحدوتة
tina
تينا العزيزة أعانك الله على شكر النعم لتخلصك من التدريس ولديك قدرة على الاستمرار في الحياة
:)
كتبت منذ قليل أن المتعلم أحلى حلقة في الحدوتة ومع ذلك تذكري ما يقال أن المدرس زي المدرس الخايب كله بينجح وهو يعيد السنة
وسنة ورا سنة ورا سنة وأنا بين ايديك تعبانة أنا
مرهق مرهق جدا
الطائر الحزين
مهما أبدعت وحاولت أن تبدع تبقى محصورا في عملية التدريس لأن ثوابتها كثيرة ومع ذلك فيه ناس بتحب الروتين في الحياة لكن للأسف مش أنا أي نعم انا مع النظام لكن في التدريس اللي تقوله ترجع تعيده لان التكرار بيفيد جدا مع الشطار زي ما انت عارف
هبقى اشوف انت حزين ليه
mirage
شكرا على تفهمك وعطفك ولا واللي يزيد المبلة طين أن مكينات التصوير في أمكنة مكشوفة جدا ... وأي تأخير في التدريس برضو بالنهار مفيش عندنا حكايا الليل والتصوير احنا
:)
ده من وجهة نظري ايجابية اضافية للتدريس
:)
الغزالي
أزعل منك وأخليك تنسخ التعليق عشرين مرة على السبورة؟؟ بلاش احنا بقينا آخر السنة والطيب أحسن
آآآه تخيل لسه في ناس بتدرس عشان تبقى قادرة على تتييس العيال بطرق علمية
عارف اللي بيخاف من العفريت بيحصله إيه؟؟ اسم الله عليك بيطلعه وأنا بقالي عشرين سنة هاربة من التدريس ولكن لا مفر من قضاء الله
نعم في التدريس هناك ربطة وتكرار لكن احنا فدا العيال عشان تتعلم وبعد أن علمته الرماية رماني
مصيرك يا طالب تبقى مدرس وأشوف فيك ساعة
:)
مهنه التدريس فعلا مهنة متعبة ومرهقة بس أنا بشبهة المعلمين والمعلمات بالجندي المحهول وطبعا بتكلم على المدرسين اللي عندهم ضمير مش أي حد تاني..
الجندي المجهول هو اللي عمل الدكتور والمهندس والإعلامي وممكن ده اللي بيصبرهم على اللي هما فيه... ومن عندك ياسكنية ارسل رسالة شكر لكل معلم ومعلمة ساهم في بنائي من الحضانة وحتى تخرجي من الجامعة
انا اعتقد والله اعلم وهذا جهد شخصى ان سوره العصر قد نزلت للمدرسين
قال تعالى(والعصر ان الانسان لفى خسر الا الذين امنواوعملوا الصالحات وتواصوا بالحق وتواصوا بالصبر)صدق الله العظيم
تواصوا اى تبادلوا الوصيه. مثلا لما بابا يواصيكى بصى كده وكده قبل ما تعدى الشارع .اصبح يوصى ويعلم
اذا الوصيه هى العلم
اذا
تواصوا بالحق وتواصوا بالصبر اى تبادبلوا العلم بينهم وصبروا على بعضهم بمعنى
صبر المعلم على جهل المتعلم
وصبر المتعلم على عدم قدره المعلم على التوصيل
بوست حلو اوى اوى اوى
والسياق جميل والصياغه رائعه واضح ان هدمن البلوج بتاعك
momken
منورنا يا ممكن وأنا بقى ممكن أضيف اسمك على كشوفات الحضور والغياب
:)
مدرسة بقى أعمل إيه وأنت عارف الصنعة تحكم
Post a Comment