ساعة ملاسنة

ترافقنا بعض الذكريات من الطفولة وليست بالضرورة سعيدة .. تبقى دون رغبة منا في الاحتفاظ بها ولكنها من النوع الثابت والي مش بيبهت مع الزمن إما لأنها مؤلمة أو متكررة أو لأنها كانت سعيدة ونادرة

( خمة صياغية)

.تأتي بعض الذكريات من التعليقات التي نسمعها عن مظهرنا دون أن يتذكر أحد أن لا سلطة لنا عليه

احدى ذكرياتي كانت وما زالت تدور حول لساني
آه والله لساني يا جماعة ورغم أنه ضمن التشريح عضو داخلي فمكانه الطبيعي داخل فمي ولن يرآه أحد إلا بطلب مباشر ولهذا الطلب أشكال وأسباب طبعا

ممكن يكون طلب طبيب أبعدهم الله عنا.... وقد يكون الطلب غير مباشر عندما يناقشك أحد أو يلطشك لأن الدقة مطلوبة ويفترض بنا كبنات مؤدبات ما نردش خالص

!!!!
ليه ماليش لسان؟؟؟ ولا هطل إن شاء الله؟؟؟؟ أيوه هو كده البنت المؤدبة ما تردش على كل حاجة!!! طب ليه؟؟ أطنش يعني؟؟ لاءه اسكتي خالص!!!! مليون علامة تعجب بتسأل ليه؟
لسانك طويل
لسانك حاد
سليطة اللسان
ربنا ما يوقع حد في لسانك
دي فقط بعض صفات لساني وعبر سنيني كنت أشعر بالغبن والضيق لماذا يحق للآخرين أن يقولوا ما يريدون ويجب علي تقبل كل ما يقال بهطل شديد كمؤشر على حسن الأدب؟
مرت سنين طويلة حاولت فيها يا جماعة التزام الصمت وتمثيل دور البلهاء كي احصل على درجة من القبول الاجتماعي ... ثم اكتشفت أنها قسمة ضيزى ومقدرش عليها

(طب ان شاء الله ما حد حبني وإن شاء الله البشرية تخبط رأسها في كل صخور الكرة الأرضية(بليز محدش يقول آمين

بعد مرور السنين اكتشفت أن طولة لساني التي كانت أكبر عيوبي بعد افتقادي لهذه الملكة نتيجة القمع المستمر لها أنها كانت سرعة بديهة!!
ما كان يوصف بملاسنة وجدل عبثي كان في الحقيقة حدة ذهنية وجاهزية بالحجج والبراهين لإثبات وجهة نظري الخاصة
بلاش طولة لسان
مش عايزين مناهدة وكثر كلام
مفيش نقاش
كل ده عشان آمورة شوية وبيغيروا مني:) طب أنا ذنبي إيه في كده
وعلى فرض أني مبتلاة بلسان لا يسعه فمي أنا ذنبي إيه في كده
آخرها حد بيعلق على ساعة مع أصلع وقد إيه كان غلبان مع لساني
عايزة أقولكم حاجة يا جماعة مهمة في ساعة السكينة دي إن المشكلة مش في لساني خالص

!!!
المشكلة إن وجدت فهي في دماغي وأنتو عارفين من الأول محاولاتي ورغبتي في التخلص منه

لو حد توصل لحل جديد في طولة اللسان وحدة الذهن ميتأخرش عليا ربنا يكرمكم وينبكوا ثواب في المعذبين من حولي

ما زلت أحاول حتى الآن حل هذه المشكلة الرخمة باني ساعات اتخذ قرار سلطاني بالتزام الصمت... تفتكروا حصل إيه؟ انقل لكم ما حدث بالحرف
ساكتة ليه؟
أبدا معنديش موقف محدد من الموضوع.
وإزاي حصل الكلام ده؟؟ أكيد عيانة!!
ممكن يكون داخل عليا دور برد( خليكوا شاهدين اني مؤدبة لآخر لحظة)
اجابني هقولك حاجة.....
هنا طبعا استدارت عيوني كأجدع قرش مفترس
أنت مخيفة وأنتي بتتكلمي....... ومخيفة وأنتي ساكتة..... وكمان مخيفة وأنتي مخيفة
تخيلوا!!! طب في ساعة زي دي أعمل إيه
عايزة على وجه السرعة كشف للبشرية عند نفساني معتبر أسعاره مهاودة

سنين مش ساعات أتحمل اللوم على سفاهة البشرية مع أني غلبانة وفي حالي

ملحوسة فلحوسة: الكلام المايل ده كلامهم عليا يبقى أكيد لازم يكون مايل

ساعة الحب الحقيقي

الحب ببببببببببببببببببببببهههههههههههههههدلة

!!!!!!!!!!!!
أظن محدش عنده اعتراض على الكلام ده

المشكلة مش في البهدلة فعلا ... المشكلة اننا منقدرش نعيش من غير حب
يا ادي الحيرة اللي انت فيها يا قلبي!!!! وربنا يرحم جميع أموات المسلمين ومعهم طبعا حليم
أندم لو حبيت وقاااااااااسيت وأندم لو عمري ما حبيت

!!!!

أنا كده رغم فقداني القدرة على اتخاذ القرار
أصل أنا راهنت وخسرت وحبيت من غير حتى ما أفكر أقدر أحبه أو مش هقدر
بحبه ومطلع عيني ولو أنه نن عيني
وزي ما كلنا عارفين ان الحب بهدلة فكل شوية اتبهدل عشان أنا بحب
واشتكي منه لكن بحب
وساعات الشكوى تكون عالية الوتيرة متواترة المقذوفات اللفظية والدمعية
اه ساعة الحب ما يطرش العين ويجيب دموعها
واتشال واتحط وانشغل بوضع الخطط المسبقة للمعركة القادمة
وأكيد في غيري كثير عارفين أننا في حالة الحب دااااااااايما على طووووول خسرانين
مش بس كده لا ومتبهدلين كمان
ساعات اخذ قرار صارم بالتوقف عن حالة الهطل والحب لكن دائما يواجه اعلاني
بضحكة ساخرة وكلمة واحدة
زوبعة في فنجان!!!! كلام سمعته كثير
بكرة تحني وبكره ليه هي ساعة مش أكثر
لو نده بس هتسيبي الدنيا وتجري عليه
ورغم مرارة الاعتراف وذل الانكسار لكن الحق يقال ان كل الكلام اللي بيتقال عليا صحيح
ويمكن شوية

!!!

بحبه طب أعمل إيه والله لو عرفتوه هتعرفو انه يستاهل حبي
وكل حب الدنيا قليل عليه وكل الدنيا ما تساوى ضحكة من عنيه
طيب وحنون وكمان أموووور
تعرف ازي اني بحبه؟؟ في عز ما أنا مقموصة ومفروسة منه صوت هامس اطير طيران مش مشي
وساعات تلاقيني اتلكك .... ندهت عليا؟؟ عايز حاجة؟؟
في كل مكان أتحدث عنه
كل صحابي بيعرفوه وساعات كمان بيحبوه
محدش يفتكر انه انسان مثالي ....أبدا ده مزاجي..... وعندي.....وفوق كل ده قمااااااااص يا ناس كمان
بالعقل لو كان عندي عقل مش مفروض أحبه أصله بيحب غيري كثير ومجوز واحدة ثانية
لكن محدش عنده عقل أفتكر بيحب
عادي لو كان الكلام كلام مجانين لأن دي نهاية غالبية المحبين المخلصين زي عنتر وقيس ابن الملوح
والله محد هيتلوح إلا أنا لو اللي بحبه شاف البوست ده
تخيلوا في سني ده وبخاف منه رغم حبي ليه
قولوا من فضلكم
يا رب تخلي بابا وتبارك ف صحته وتقدرني دايما اني أبقى بطته
ملحوظة: يمكن تغيير البطة في البيت السابق بأي حيوان آخر أو أداة لكن المهم يكون مع الأمور قمر البدور
بابا حبيبي وصديقي في ساعات عقلي وجناني وكفاية انه مستحملني العمر ده كله

يا وردة حياتي بحبك طول العمر وباستمرار وباصرار كمان
تحية قلبية خالصة صادقة ودعوة في جوف الليل أن يرزقنا الله بر والدينا وحبهم يا رب

ساعة مع طبيب نفسي

في مرة سألت مدرسة الموسيقى بعد طول حديث عن الأذن الموسيقية ودورها وجمالها كيف تكون الأذن موسيقية أو كيف تصبح كذلك فأجابت ضاحكة يجب أن تكون كبيرة جدا واضح جدا أنها أذن مثل أذن الفيل!!! أسرد الحادثة خلال تفكيري لزوم ما يلزم كي تكون طبيبا نفسيا؟ فلو كانت الأولى تتطلب أن تكون أذن من الناحية الشكلية والتشريحية قادرة على السمع بدقة فهو أمر يسهل تمييزه فهل يجب أن يكون المختص النفسي نفس نفس؟؟ يعني إيه!!! هل يعني عاطفي أو حنون جدا أو عدم المؤاخذة مجنون برضك بشدة؟
أثناء سفري جلست بجانبي سيدة متبرجة بشعر مصبوغ ومصاغ كثير يرافقها رجلان أحدهما شاب والآخر أقرب إلى الخمسين من عمره تبدو على ملامح الشاب الخضوع والطاعة وتبدو على ملامح الكبير العمق والتكبر بينما كانت سيدتهم تتفجر غضبا مكبوتا بعد تركهم لها بجانب متاعهم وانصرافهم لبعض أمرهم تناولت هاتفها المتنقل وبدأت في الحديث الذي لم أقصد تسمعه ولكن صوتها كان من النوع الحياني كنت أشاهد برنامج عن بطولة البلياردو التي خبرتي فيها تقاس بخبرتي الموسيقية والنفسية كان مجمل كلامها شكوى من الكبير وكيف أن معه تابعه الأمين وأن سلوكه لم يعد يطاق وردا على محاولة تهدئتها من الطرف الآخر قالت لاءه مفتكرش انه قادر يستفيد من الكلام اللي عمال يقوله للعيال لليل نهار!! ده أكل عيش مش أكثر!!!!!1 يبدو أنها لم تكن في حالة تسمح لها بتقبل أي مخالفة لرأيها بأنه غير طبيعي وإمعانا منها في شرح معاناتها معه من سنين قالت أساسا كل الناس اللي بتدرس علم نفس مجنونة من الأساس..... وجنانها واللي ناقصها هو السبب خلف اختيار التخصص التعيس!!!لو كان فالح كان درس حاجة عدلة!!!! واااااااو!!!! أول نقد كنت أسمعه يوجه لعلم النفس وأصحابه فهم عادة صفوة وجهابذة نحترمهم ونخشى قدرتهم على اختراقنا وفضح أسرارنا فضحكت.... وهنا أدركت تلك السيدة وجودي بجانبها فرمتني بنظرة نارية متحدية أن أجيب أو اعترض وبالطبع لم افعل فتلك معركة لا ناقة لي فيها ولا بعير في ذلك الوقت بعد قليل عندما عاد الكبير المختص وتابعه الأمين سارعت بإغلاق هاتفها وفي نفس اللحظة راوغت الكرة لاعبها فبعد لمسها للمرمى رمت بثقلها للجهة الأخرى وجرت بعرض الطاولة فضحكت لأن الحياة مبتريحش حد ولا حتى الكرة بتريح لاعبها .....هنا وصلتني لافا البركان النشط بجانبي فقالت يعني ما شاء الله متابعة قوي!!! وفاهمة اللعبة؟! نظرت إليها وأنا أجمع أغراضي مهاجرة بعيدا عن بركانها الحقيقة لاءه ولكني استمتع بالمشاهدة لعلي أتعلم أي لعبة في الحياة فأنا لا أعرف غير الجد وحياتي كلها وش واحد!! بعد أن شهقت ودعتها بابتسامة فلا أحد بإمكانه أن يستفزني في ساعة سكينة طبعا ما عدا معالجتي التي أكتب هذه السطور انتقاما منها واسأل نفسي هل يا ترى من أطلب مساعدتها أكثر جنونا مني حقا؟ هل هم فعلا ناقصهم حاجة بيعوضوها في حياة الناس؟ يعني هم مش تمام نفسيا؟ يعني إذا كان بإمكان أي أذن أن تصبح أذنا موسيقية يمكن لأي... أن يصبح مختصا نفسيا؟؟ وهل لأنهم أصلا ... أقدر من غيرهم على فهم....... ؟ تتحدث بثقة عن حياتي ومشاعري لا أستطيع بنفسي أن اجزم بأنها تجري بهذه الكركبة في داخلي!!!! تتحدث بثبات كأنها تقرأ نشرة اخبارية!!!! ساعات يكون أعلى تركيزي على نبرة صوتها!!!! أسئلة كثيرة لكن مش لاقيه إجابة عليها هل يخبرني أحدكم عن طبيبه النفسي وهل كلهم في ساعات......

ساعة الكذب

تعى ولا تيجي واكذب علي الكذب مش خطية
من ساعة ربنا يكرمها فيروز ما قالت الكلمتين دول والناس افتكروها فتوى شرعية تبيح الكذب
مهي لسه قايلة بعظمة لسانها أنه ليس خطيئة وهنتبع اجتهادها وفي فوضى الفتاوى أي حد ممكن يفتي حتى وإن كان يكذب.... ما علينا
موضوع الكذب بقاله فترة مخبط معايا جامد وأنا بقول الله يخزيك يا شيطان وبلاش سوء ظن وبلاش نشر غسيل العباد
لكن لقيت أوبرا وينفري بقى بتنقر على الموضوع وتذكر دراسة تشير إلى أن الإنسان العادي يتعرض لحوالي مئتين كذبة يوميا!!! يعني كذبة كل خمس دقايق

!!!!!

ده في بيئة الدراسة الغربية مع الحريات المتاحة والاستقلالية واللي مش عاجبه يشرب من البحر امال لو طبقوا الدراسة علينا يا ترى هتكون النسبة إيه... وأترك لجنابكم بما هو معروف عنكم من حكمة ودراية وحسن تقدير البت في الموضوع

تكون قاعد في أمان الله يحب حد يستلطف ويتمطع على حسابك طبعا يفتح موضوع إيه رأيكم في الكذب؟
أي لون منهم؟
لهو الكذب ألوان؟
أيوه نزل منه الأبيض اللؤلؤي والعادي والشفاف؟
كذب شفاف؟؟
أيوه يعني مفقوس خالص لكن أهو بيقضي الغرض
وازاي يقضي الغرض وهو مفقوس؟ وليه نكذب كذب مفقوس؟؟ هي الخيبة حصلت أننا مش عارفين حتى نكذب

!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!
ما تغيرش الموضوع وجاوب
هو إيه الموضوع أساسا؟؟
رأيك في الكذب
ممممم
يعني لازم اقول الحقيقة ولا ممكن أكذب؟
هتكذب في موضوع الكذب!! ده أنت حكاية
قصة قصيرة من فضلك مفيش وقت للروايات, ومن الآخر عايزين مني إيه أصل ورايا شغل- دي كذبة للخلاص من غلاستهم-
عايزين إجابة محددة عن كمية الكذب وتوقيته في حياة سعادتك
اللي افتكره إن الكذب كان حرام على أيام تربيتي- كانت مجرد محاولات باء معظمها بالفشل- وآخرته وحشة
وكنت أعرف أن الكذب ما لوش رجلين وبرضو مكانش ألوان على زماني
ثم أنا هكذب ليه يعني- دي في الحقيقة أخيب كذبة-
وأنا عمري ما كذبت- ودي بقى آخر كذبة في سجلك
يعني ما بتكذبيش خالص؟؟
إزاي !!! طبعا بكذب كل يوم.
كل يوم!!! مع أن شكلك ميقولش كده
شكلي أكبر وأقوى كذبة في حياتي .....كينونة متخدش منها خوانة شوية براءة على شوية هطل لكن الحقيقة غير كده خالص
دي كذبة مفيدة صيت غنى ولا صيت فقر
عملت دراسة سريعة كده فضلة خيركم عن الكذب
لقيت الكذب الأبيض هو ما ينجيك من مشكلة يستحسن تفاديها وفيها مصلحة للجمهور وتقول مثلا لالا مكانش قصدي طبعا , أصل أنا ما سمعتش التليفون, يا سلام ده أنت تنوريني , ما دقتش أطعم من كده!
الكذب الأسود اما تحمل حد خيبتك الثقيلة وعادة ما يبدأ هذا النوع ب مش أنا.... وممكن تكون داهية مسحية وتقول مين اللي
كذب من غير لون حاجات بنقولها ساعات ونشيل ذبنها من غير داعي مثل وحشتوني, طبعا ذكية
ونستطيع أن نصنف الكذب بألوانه السابقة حسب أدائه الوظيفي فنقول فيه كذب مفيد وكذب ضار وكذب ماسخ قصدي محايد
طبعا أنا فتكم في الكلام وخبيت وما قلتش عن أصدق كذبة في حياتي
وبكده يكون لي السبق المدوناتي في الكتابة عن كذبة أبريل قبل أي حد
مين بيكذب ولو ساعات ومين ما بكذبش خالص؟؟