ساعة غداء

وصلتني دعوة لغداء عمل
:)
الكلام بجد والغدا جد جدا
ويبدو أني مضطرة للذهاب هذا العام وكفاية السنين اللي طنشتها
محتاجة حجة قوية عشان أغيب أصلي مش عايزة أروح ولو الغدا ببلاش
شوفوا
غداء عمل يعني أشوف نفس الناس الغلسة اللي وشي في وشها كل يوم في الشغل واللي أنا عرفاها وطالعة عيني منها يعني بناقص ساعة زيادة أتملى فيهم ولا إيه
غداء عمل يعني تعمل فيها شيك وكلاس وتقلب في الأكل بس .... آه بجد وكثيره لقمة أو اثنين عشان ميبانش أنك مفجوع أو مفروس من طريقة أكلك
في غداء العمل مفروض نتلهي على عينا وما نبصش للناس إلى فوق نبص بس في طبقنا وهما يكروتوا كل الأوامر والطلبات إلي زي وشهم وعايزة أكثر من مشروبات غازية عشان تتبلع
وانتو طبعا عارفين عيب نتكلم والأكل في بقنا ... طب ينفع أتفه في وشهم وأتكلم
غداء عمل على غرار مبدأ جدتي اطعم الفم تستحي العين
أنا عايزة محفزات عشان أروح غداء العمل
رقاصة...... ومطرب شعبي....... وقرداتي
:)
لو حد من اللي عارفني يشوف الكلام ده هيعرف أني سلمت أخر حتة من عقلي
يا إما كنت بهلس عليهم في كل ساعاتي اللي فاتوا
الحلو هيقول رقاصة يا مفترية وعلى غداء عمل.... طب أعمل إيه أنا بنام بدري ومش بتعشى
وعشان خاطر التواضع في الطلبات ممكن أتخلى عن الرقاصة
وعشان خاطر الناس الحلوة ممكن أعتبر المدير هو المطرب الشعبي
لكن لا وألف لا لن أتخلى عن القرداتي
عايزة حاجة تطري على مراوحي مش ممكن كده يا جماعة
وسلامي الحار إلى كل مزنوق في غداء عمل وكل غداء عمل وأنتو طيبين وعنه بعيدين

ساعة ظن

كنت أظن الريح جابت عطرك يسلم علي
كنت أظن الشوق جابك تجلس بجنبي شوي
كنت أظن .. وكنت أظن.. و... خاااااب ظني
!!!!!
معلش ما تزعلش
أيظن؟؟ أيظن؟؟ تري تري
اسم فيلم كان نازل من مدة وغالبا مش هشوفوه لكن دعايته تحاصرني والأولى كلمات أغنية محمد عبده الأماكن كلها مشتاقة لك
أنا أيضا كنت أظن
هناك نفي صريح عن الظن وضرورة الإعتماد التام على الحقائق
!!!
طب أعمل إيه؟؟؟؟ مهو أنا لو لاقية حقائق أو حتى بيانات مش هأظن
العالم يرقص اعزائي ويتراقص والرؤية غير واضحة ولا أسهل من تغيير مسميات الأشياء وزي ما بيقول المثل " عنزة ولو طارت" فرغم الحقيقة القديمة القائلة بعدم مقدرة المعيز على الطيران تجد من يحاول إقناعك بإمكانية ذلك
العادي أن المعيز لا تطير لكن معزتهم سبحان العاطي الوهاب بقى يا أخي خارقة وقادرة على الطيران
!!!!
في هذه الساعة خياراتك محدودة..... يا إما تتخانق وتقول بالفم المليان لاءه بقى..... لو طارت تبقى مش معزة اساسا أو تعك الدنيا وتظن في بعض المسلمات وتقول احتمال برضو!!!! وأدام المعيز أصبحت قادرة على الطيران أظن أنا بقى براحتي أن الصداقة قد تكون الشيء الوحيد بين رجل وأمرأة!!! وكنت أظن الخير ينتصر دائما!!! كنت أظن الطيبين أكثر سعادة!!!! كنت أظن الناس حلوين!!! كنت أظن أني واضحة جدا ولن أدخل دائرة الظن
باختصار اكتشفت إن حالي من حال محمد عبده كنت أظن وكنت أظن وخاااااب ظني في حاجات كثير وناس أكثر
أنتو بقى ما ساعات الظن عندكم
؟؟؟؟
وعشان نفتح اللون الغامق نقول إيه الساعات التي لم يخب فيها ظنكم

ساعة عزومة

حد النهاردة فكرني أما خيرني بين عزومة سمك في الاسكندرية وزيارة لجدة يرافقها عمرة طبعا بحادثة من بتوع زمان أيام ما كان الزمان فاكرانا ونحن قطعة من الحياة

................
ما علينا عموما كملوا المفروض كده انها ساعة فرفشة
ومش عايزة قر لا يظنن أحد أن العزومة المفتوحة على البحري دي حقيقة دي تبع ابقى خلينا نشوفك يا راجل
لكن يا ترى لو كانت حقيقة وهختار أختار بعقلي ولا قلبي؟؟!!! قلبي طبعا هيروح البحر سامحني يا ربي لكن عقلي هيروح عمرة عشان مش فاضل في العمر قد اللي فات أدام بقينا بنتكلم في الذكريات
:)

احكيلكم عن طريقة من طرق التربية العربي
كان يا مكان في القرن الماضي من الزمان محدش يزهق في النص هشوف اللي مش يكمل قراية في مرايتي
بنات قطاطيط خالص وكنت واحدة منهم
وبما أننا وصلنا مرحلة متقدمة من العلم فبقينا في الصف الثاني ابتدائي اصبح لدينا معرفة كافية وذاكرة قوية تقول أن الحصة الجاية دي حصة فن يعني شخبطة في الألوان ورغي مش عارفة على ايه ...... ما علينا
المهم
بصينا لقينا مدرسة الدين المتينة داخلة يا ولدااااه علينا
وبرغم أننا صغيرين فتة خالص إلا أننا زعازيع عرب يعني شجبنا ورفعنا أصواتنا بالاستنكار بأقصى درجات الاستهطال
فرمقتنا المدرسة من وراء اطار نظارتها الأسود العريض بنظرة احتقار يستحقها زعازيع الكفرة المعترضين على حصة الدين ومصرين على حصة الفسق المهين- كان رسم مش رقص

وسألت في منتهى الدهاء مين اللي عاااايزة حصة دين تيجي الناحية اليمين ومين اللي عااااايزة حصة فن تيجي الناحية الشمال
لن أدعي الطهر والبراءة أصلي كنت أكثر براءة من أني أخاف أو أخون حد ولست في وارد التدين المظهري
دي حواديت المراهقة احتمال اقولكم عليها بعدين
المهم
انا يا جماعة رحت رايحة ناحية الشمال... قالتلي لاءه أنت قلت انك عايزة حصة دين وده يشهد الله كذب
تعالي هنا يا بنت
ربما دي كانت أول خطواتي كي أصبح خروف قصدي إنسان منسجم اجتماعيا
وبعد ما قسمت بالحق بين المتدينين الأطهار وصغار الكفار قامت بضرب المنحلين المفضلين للفن على الدين بالعصاية على ايديهم وده عشان يتوبوا عن تفضيل الدنيا على الدين
أنا ساعتها كنت مصدومة وشاعرة بالذنب مفروض يعني أنا مع الفسقة على أحسن تعديل لكن عشان أنا كنت عموما بنت لطيفة-زمان جدا يعني- ومن المشتركات في مسابقة حفظ القرآن المربية الفاضلة قررت أني لا استحق العقاب بدليل وجود شيء من كتاب الله في صدري ينفي عني تهمة الفسق
وأنا بقول الاكتئاب بجيني منين؟؟؟؟ منين يا جدعان؟؟؟؟؟ ده الواحد عدت عليه ساعات ياما

اللي فكرني بالحدوتة المنسية دية حيرتي في الاجابة أجاوب بشياكة واقول انا متدينة واختار العمرة ولا اقول الحقيقة وأني ميتة أروح البحر ولأني تعلمت النفاق بدري بدري اعتذرت عنهما معا مفتكرش ربنا هيقبل مني عمرة نفاق ولا إيه

إنسان نهاية الإسبوع

لو عايز تشوفني غمض عينك تشوفني
أديني سهلتها عليكم خالص هتشوفني من غير ما تغمض عينك هو أنا لسه هتعبكم معايا غمض عينك وفتح عينك واحنا آخر الإسبوع
ومعظمنا جايب جاز يا من تعب الشغل يا من الوقت اللي بيمر من غير شغل أو في البحث عن شغل
الصورة دي تعبير حي يصفني بمنتهى الشفافية في نهاية الإسبوع
في الاصل شيك وحلو ولكن في نهاية الإسبوع متعاص ومتلحوس مش في الطبق لكن في الحياة
إلى كل المتلحوسين من الشغل أجازة سعيدة إن شاء الله
يعني من غير زيارات ولا طبيخ ولا غسيل ولا تصحيح متأخر ولا حتى مفاجأة من نوع يا ما جاب الغراب لأمه
:)
اجازة من بتوع تتمتطع في السرير لابس البيجاما طول النهار وكيس شيبسي يونسك

ساعة صداقة

هل صادقت ميتا

؟؟؟؟؟؟

لا أعني أن تكون قد فقدت صديقا فهذا أمر عادي ومتوقع ولكن هل تعرفت على ميت وشعرت أنه صديقك أو أنك ترغب في أن تذهب إليه ليكون صديقك؟؟
أتحدث اليوم بجدية وليس بمدوناتية
هكذا شعرت بعدما سمعت برنامج عن كتاب لكاتبة وبقيت الكلمات عنها لثلاثة أيام ترن في أذني فلجأت لمن لا يخذلني إلا نادرا رغم إرادته...
أنه حاسوبي ومحركات البحث
كتبت اسمها فقط.... دون الطريقة المعتادة لكتابة العنوانين
صدق إحساسي مجرد اسمها كان كافيا
وجدت بضعة عناوين تحمل اسمها وخوفا مني على أن لا أعود لأحظى بفرصة التعرف عليها حفظت الصفحة ضمن قائمة التفضيل
وبخوف طفل فرح بهدية ... يفرح لحصوله عليها .... ويخشى ألا تكون ما يتوقعه
اخترت قراءة العنوان الأول عنها
لا تخلو حياة من لحظات سعادة

وجدت عنها نبذة بل وأكثر نماذج من كتاباتها ونسيت أني كنت على عجلة من أمري
وأنا دائما على عجلة من أمري
بدأت أقرأ كلماتها كأنها تخاطبني
في البداية تمنيت لو أن هناك فرصة للقائها
ثم بعد مرور دقائق بيني وبين أفكارها لم يعد اللقاء مهما
أنا أحبها وهي صديقتي دون لقاء
ليس لبعد المسافة المكانية ولكن لاختلاف نوعية الحياة
كيف لها أن تكتبني دون أن تعرفني

!!!!
كيف لزماني أن يعيد أحداث حياتها
أحدث صديقاتي ميتة رحمها الله
قرأت في إحدى المرات أن سبب كتابة المشاهير لسيرهم الذاتية فقدانهم مساحة الصداقة الحقيقية في الحياة من حولهم لشدة المنافسة فيلجئوا للورق كمساحة للتعبير المفقود في حياتهم الخاصة فهل تعتبر كتباتنا لمدوناتنا أيضا من باب غياب الصداقات الحقيقية في حياتنا
هل حقا تضيق بنا الحياة فلا نجد من يسمعنا سوى من قد يقرأنا من الغرباء
كيف يتحدثون عن شخصيات هامة وأخرى غير هامة وجميعها تنتهي بالفناء
جواب السؤال في هذه الساعة أنك تقرأ الشخصيات الهامة بعد فنائها فتصادقها وتتمنى أن يصلها إحساسك بهاوفي ساعة أخرى قد يختلف جوابي على سؤالي

لو سمحتوا هاتوا معايا تعبت وأنا بهاتي لوحدي

:)

الفرح

لنتصارح في ساعة سكينة

من أين يأتي الفرح

؟؟؟

وصلتني الصورة في بريد استوقفني فيها التناقض الصارخ بين بؤس الخلفية وابتسامة الفتية ووجدتني أحفظها باسم ينبوع الفرح

علي أجد جوابا لسؤالي من أين يأتي الفرح

دمار وركام وثياب رثة قذرة لم تمنع ابتسامة عريضة صادقة ونظرة تصميم وقبضة مغلقة

اجدني افتح الصورة واسرح وبدل أن أجن قلت لأشاركها آخرين

لكن على كل الداخلين والناظرين أن يعبروا عن أفكارهم بكلمات فحاليا خيار التواصل عن بعد لايعمل بكفاءة

ساعة ملاسنة

ترافقنا بعض الذكريات من الطفولة وليست بالضرورة سعيدة .. تبقى دون رغبة منا في الاحتفاظ بها ولكنها من النوع الثابت والي مش بيبهت مع الزمن إما لأنها مؤلمة أو متكررة أو لأنها كانت سعيدة ونادرة

( خمة صياغية)

.تأتي بعض الذكريات من التعليقات التي نسمعها عن مظهرنا دون أن يتذكر أحد أن لا سلطة لنا عليه

احدى ذكرياتي كانت وما زالت تدور حول لساني
آه والله لساني يا جماعة ورغم أنه ضمن التشريح عضو داخلي فمكانه الطبيعي داخل فمي ولن يرآه أحد إلا بطلب مباشر ولهذا الطلب أشكال وأسباب طبعا

ممكن يكون طلب طبيب أبعدهم الله عنا.... وقد يكون الطلب غير مباشر عندما يناقشك أحد أو يلطشك لأن الدقة مطلوبة ويفترض بنا كبنات مؤدبات ما نردش خالص

!!!!
ليه ماليش لسان؟؟؟ ولا هطل إن شاء الله؟؟؟؟ أيوه هو كده البنت المؤدبة ما تردش على كل حاجة!!! طب ليه؟؟ أطنش يعني؟؟ لاءه اسكتي خالص!!!! مليون علامة تعجب بتسأل ليه؟
لسانك طويل
لسانك حاد
سليطة اللسان
ربنا ما يوقع حد في لسانك
دي فقط بعض صفات لساني وعبر سنيني كنت أشعر بالغبن والضيق لماذا يحق للآخرين أن يقولوا ما يريدون ويجب علي تقبل كل ما يقال بهطل شديد كمؤشر على حسن الأدب؟
مرت سنين طويلة حاولت فيها يا جماعة التزام الصمت وتمثيل دور البلهاء كي احصل على درجة من القبول الاجتماعي ... ثم اكتشفت أنها قسمة ضيزى ومقدرش عليها

(طب ان شاء الله ما حد حبني وإن شاء الله البشرية تخبط رأسها في كل صخور الكرة الأرضية(بليز محدش يقول آمين

بعد مرور السنين اكتشفت أن طولة لساني التي كانت أكبر عيوبي بعد افتقادي لهذه الملكة نتيجة القمع المستمر لها أنها كانت سرعة بديهة!!
ما كان يوصف بملاسنة وجدل عبثي كان في الحقيقة حدة ذهنية وجاهزية بالحجج والبراهين لإثبات وجهة نظري الخاصة
بلاش طولة لسان
مش عايزين مناهدة وكثر كلام
مفيش نقاش
كل ده عشان آمورة شوية وبيغيروا مني:) طب أنا ذنبي إيه في كده
وعلى فرض أني مبتلاة بلسان لا يسعه فمي أنا ذنبي إيه في كده
آخرها حد بيعلق على ساعة مع أصلع وقد إيه كان غلبان مع لساني
عايزة أقولكم حاجة يا جماعة مهمة في ساعة السكينة دي إن المشكلة مش في لساني خالص

!!!
المشكلة إن وجدت فهي في دماغي وأنتو عارفين من الأول محاولاتي ورغبتي في التخلص منه

لو حد توصل لحل جديد في طولة اللسان وحدة الذهن ميتأخرش عليا ربنا يكرمكم وينبكوا ثواب في المعذبين من حولي

ما زلت أحاول حتى الآن حل هذه المشكلة الرخمة باني ساعات اتخذ قرار سلطاني بالتزام الصمت... تفتكروا حصل إيه؟ انقل لكم ما حدث بالحرف
ساكتة ليه؟
أبدا معنديش موقف محدد من الموضوع.
وإزاي حصل الكلام ده؟؟ أكيد عيانة!!
ممكن يكون داخل عليا دور برد( خليكوا شاهدين اني مؤدبة لآخر لحظة)
اجابني هقولك حاجة.....
هنا طبعا استدارت عيوني كأجدع قرش مفترس
أنت مخيفة وأنتي بتتكلمي....... ومخيفة وأنتي ساكتة..... وكمان مخيفة وأنتي مخيفة
تخيلوا!!! طب في ساعة زي دي أعمل إيه
عايزة على وجه السرعة كشف للبشرية عند نفساني معتبر أسعاره مهاودة

سنين مش ساعات أتحمل اللوم على سفاهة البشرية مع أني غلبانة وفي حالي

ملحوسة فلحوسة: الكلام المايل ده كلامهم عليا يبقى أكيد لازم يكون مايل