ساعة هدايا

ما العلاقة بين القلب والقدم؟؟!!
حد باله رايق اللهم لا حسد هيقول قديما كانت القدم محل تقدير وتكريم واحترام على اعتبارها شايلة البني آدم
وتقديرا لمجهودها كانت تتحط على الوسادة أول الليل عشان في آخر الليل محدش يفتكر أيه اللي حصل غير يحيى الفخراني
ادي القدم عرفنا حكايتها امال القلب ليه محدش كرمه قوي كده غير في الفالنتين وكل سنة واحنا حلوين وفي الخرافات والبدع سارحين ومرحرحين
كانت قدماي اليومين الي فاتوا كانوا طريق لقلبي
لا مش قوي!!! حد يفتكر حد باس رجلي ولا حاجة استغفر الله أساسا أنا مش ممكن أقبل حاجة زى دي ثم إحنا كلنا يعني أخوات
أول حاجة وخطوة كانت بلغة حرير
ثاني حاجة كان بوت شتوي معتبر
ربنا يكرمهم أصل ميهونش عليا اصرف ويوم البرد أتكلفت في السرير وخلاص ويلاش منها أي خروجة
آخر حاجة بقى كانت النهاردة صبحت أشرب القهوة الباب خبط وأنا في أسود لحظاتي المزاجية
جاتني هدية فاخرة من الحاجات اللي بنتفرج عليها في المجلات
feet rest
لونها نبيتي

كل دا ليه؟؟
هدايا من ناس بحبها وواضح إنها بتحبني تفكيرها جايب لحد كعوبي
ما شاء الله والله أكبر
ليه اختاروا يهادوا أقدامي؟؟؟
سأترك الإجابة لكم طبعا
لكن خطر على بالي أن أقدامي قد تكون أكثر ثباتا ووضوحا وأسهل من دماغي
:)))
أو أن حبايبي لهم جذور صينية حيث كانت القدم تحترم وما زال لها علم يسمى الريفلوكسولوجي
http://www.bafree.net/forum/archive/-32891.htm
ما علينا المهم وضوح العلاقة بين قدمي وقلبي مش تقولي الطريق لقلبه معدته شوية والهدية تروح مش عارفة فين!!! طبعا خدوده
عموما برضو جاتني هدايا ثانية ومحدش يقر ولا يسأل الهدايا دي ليه هم شايفني ملحوسة في قعر الحياة فحبوا يهشتكوني شوية فيها حاجة دي؟!
يشكروا طبعا وعلى رأي عم عبعزيز الشكر لله وحده مرقق قلوبهم عليا
وعشانا عليك يا رب شبشب وصندل صيفي
والكلام يجر كلام
الحاجات دي فكرتني بهدايا مختلفة جاتني في حياتي
إلا هيا الناس بتهادي بإيه؟؟!!
أوحش حاجة أما حد يقولي نقي هديتك وأنا أدفع.....رخامة وجليطة رغم طيبة القلب
ساعات كانت الهدايا كتب طبعا ندموا أشد الندم بعد ما عانوا تأثيرها على دماغي ما عدش حد يهاديني بكتاب احتمال يكونوا بيدوروا على أستيكة
أقلام للكتابة.... مش حاجة ثانية, شنط بالهبل أصل معروف حبي للجلديات
هدوم طبعا عشان ما أكسفهمش أمام المجتمع
حبيبتي على طول طبعا حاضرة الشيكولاته
فناجين قهوة ومجات ميتعدوش منهم واحد من ثلاثة فالنتين فاتوا أمامي بلفته الحمرا ومن غير يمين من واحدة من الانتيمات بتوعي يعني حريمي برضو!!!
حاجة مكسوفة أقولها لكن أمري لله أنواع مختلفة من الصابون
الغريبة بقى كم الدباديب والحاجات المحشية الي بتوصلني أخرها في عيد ميلادي مش هقول الكام النهاردة ممكن وقت ثاني وعشان الرقم كبير كان الدبوب لونه أزرق خوفا عليا من الحسد
جاتني هدية مكتوب عليها سبحان الله...تفتكروا كان قصدهم حاجة؟؟ عموما طبعا أنا أعجوبة من خلق الله تستثير التسبيح فسبحان ربي العزة سبحان ربي العظيم
سمعوني بقى ساعات هداياكم