ساعة خلط

ذنبك إيه؟؟ لسه بتسأل؟؟؟!!! هو بعد الحب ذنب!!!
هاؤ...... حياتك ألوان كوري هتبهت عليك وتسيح
ليه؟؟ الغولة بتحبك!!!
وتبقى الأغنية بعد التعديل
ذنبك إيه؟؟ يجاوب الكومبارس الغولة بتحبك!!
وما له أهي كلها مصائب ومصائد في الشارع أو الحياة
والعيال بعد كده يجروا وراك في الشارع ويقولوا
حبيب الغولة أهو أهو يا ولاد....
ساعتها موقفك بجد وشكلك مش هيكونوا قد كده وبريستيجك هيبقى ضحل خالص!!!
ومن غير زعل ولا حساسية أو حشرية مين الغولة دي؟؟
يا ترى الغولة دي أمك؟؟ وطنك؟؟ أمنياتك؟؟
مش أنت يا قلبي اللي جريت عليه؟؟!!! أشرب دموعك بكاس طموحك.
هل تستطيع الفرار من الغولة؟؟؟؟؟؟؟؟؟؟؟
سؤال صعب أتمنى تلاقي حد في ساعة زهزهة يفيدك ويجيبك!!!!! عن نفسي سأحاول وأبذل جهدي.
لو كانت الغولة أمك فهذا يعني أنها وطنك ولا أحد يستطيع الفرار من وطنه, ولو تركته وهاجرت فستحمله معك أينما ذهبت فوفر ثمن التذكرة والهدة في الشيل والحط والوقفة على أبواب السفارات من أجل الفيز والإجراءات.
طب إن كانت الغولة أمنياتك؟؟!! تقدر تسيبها وتكمل من غيرها حياتك؟! هتجيب أمنيات جديدة وتبقى من ثاني غولة جديدة في حياتك.
عارفة أنك خايف من الغولة لكن الموضوع خرج من إيدك وبقى عندها وباينها كبرت في دماغها وكان الله في عونك وبتسأل إيه ذنبك ؟ الغولة ببساطة بتحبك!!
مش تزعل شوف الناس حواليك كل له غولة تطلبه وهو ينادي يا مغيث..... اللهم آمين.
فاكر لما كنا صغار نبكي خوفا من الغولة؟ كانوا يقولوا لنا أن اللي الغولة بتحبه يبقى يا بخته ساعتها مش هتمسه بسوء......
يبقى حب الغولة بختك ولا ذنبك؟ فكر في ساعاتها وساعاتك!