ساعة العيد

تقبل الله طاعتنا أجمعين وأعاده علينا بصحة وعافية

واللي عمل كحك يدي للي ما عملش

وكعكة منك صغيرة تخفف عنك سعرات كثيرة

وهنيالك يا فاعل الخير

ساعة حق

استاذي العزيز في ذمة الله عسى الله أن يرحمه برحمته الواسعة ويتقبله قبولا حسنا وأن يبدله دارا خيرا من داره وأهلا خيرا من أهله وأن يكون لدعاء من دعا له من المؤمنين مجيبا

رغم معرفتنا بأن الموت علينا حق وما نكرره بأن الموت هو الحقيقة الوحيدة الثابتة في هذه الحياة يبقى الموت دائما مفجعا

أكثر ما يحزنني أني لم أشكره في حياته كما ينبغي له الشكر على ما علمني وأعانني ولكن يعلم الله كم أذكره بخير وأهله بين طلابي ولا أنساه في دعائي

لكن يبقى عقلي دائما عدوي اللدود الذي رفض أن أرسل له بمناسبة رمضان مقررا الانتظار لما يبارك به فعلا وهو العيد ولكن ما لم يحسب حسابه عقلي هو أني لا أضمن بقائي وخسرت فرصة معيادته للأبد

رحمه الله وسائر أموات المسلمين ورحمنا إذا صرنا إلى ما صاروا إليه

احبائي لا تنتظروا أبداا بل سارعوا بإبداء مشاعركم لمن يهمكم أمرهم ولا تتخاصموا فالحياة قصيرة لا تتحمل القطيعة

أبكيه وأستغفر الله له كلما ذكرت تقصيري بحقه عسى أن ينفعه دعائي أكثر مما وصلته بالدنيا

عسى الله أن يرزقني حسن الخاتمة فقد توفاه الله صائما أثناء عمله وكانت آي القران الذي يحفظه آخر ما سمع منه في الدنيا جعله الله له نورا في قبره

في رحمة الله وهو خير الراحمين..... آمين

ساعة غضب

أمور تفرس وناس تغيظ
عايزين يمشوا الدنيا على هواهم ماشي موافقة لكن من فضلكم بعيد عني
ممكن ما أتكلمش ولا أتبرع برأي ولكن لو سألتني كن مستعدا لتسمع ما عندي ولن يكون دائما مرضيا لك
اعوج وميز في المعاملة براحتك لكن ما تتوقعش مني أطنش أو أوافق
تعبت من العوج وتعبت من الطناش
سأستعد لكافة أشكال الشجار لكن المشكلة طول القمع سلبني ميكانزمات وفنيات القتال
اللي بيقص مخالب القطة حرام عليك حرمتها فرصة الدفاع عن نفسها
يا اللي بتقص جوانح الطير حرام عليك حرمته الدفاع عن نفسه حتى بالهروب
ما أنا قلت أنها أمور تفرس وناس تغيظ
تنتهي الأحلام وتترك فراغا قاسيا
أكون طيبة كان حلم عيشني في كابوس حقيقي سنين طويلة ولما فقت منه لقيتني أضعف من أن أقاتل
ومفيش غير أحلم أكون شريرة ....فكن مستعدا

عايز منها إيه

لابسة فستان أحمر وعاملة شعرها رول وعندها أدوات مطبخ تحولت لأسلحة حربية

يبقى عايز منها إيه أكثر من كده

كلها حاجات تفرس وناس تغيظ

تجديد وأحلام

مش هبطل مفاجأت الصيف ده

:)

غيرت بداية البوست مارش سريع للرغي دون أي اشارة لموضوع الساعة يلا بلاش ملل وبلاش نظام

ومن أشكال الرغبة في التجديد وكسر الروتين الحلم بتجديد شكل مكتبتي الفكرة المجنونة بدأت مع إيميل فيه شوية رفوف عجب اخترت منها بس الي عجبني أنا متسلطة زي ما أنتو عارفين ومتأكدين كمان

تفرجوا على الصور واختاروا الرف الي تتمنوا تعملوه وحاولوا تحددوا الرف الي عاجبني فعلا وبدأت أحلم بيه

اختيارك للرف يعكس جانب من شخصيتك هأقولك عليه لو قلت أي رف عجبك أكثر

إلى الرفوف العجيبة الظريفة

1

2

3

4

5

6

7

توتة خلصت الحدوتة حلوة ولا ملتوتة

ساعة جديدة

أنا فرحانة وهأطير من الفرحة....لا استنوا مش الي خطر على بالكم خالص أنما الحمد لله بقيت زي الناس المهمة والحساسة اللي بتعاني من الكوابيس أي نعم أنا حلمت حلم مزعج شهقت ومن ساعتها وأنا صحاية ومش جايلي نوم أول مرة تحصل معايا الحكاية دي

العادي أن نومي قليل والعادي أني معرفش أنام أو أنام متأخر ولرداءة نوعية نومي من النادر أني أحلم فما بالك أحلم ويكون كابوس مش بقولكم جديدة
شكلكم عايزين تعرفوا تفاصيل الكابوس هو كان مختصر ما أنا قولت أن نومي قليل يعني الطبيعي يكون الكابوس مختصر
خطر على بالي أزودكم بعنواني لو كان فيه ضرورة لتفسير الكابوس على أي قناة من قنوات تفسير الأحلام للحصول على بعض الدعم المادي أدام صعب حد يناولني كباية مية ويسمي عليا
شاغلني أكثر من التفسير سبب حالة الاستنفار لجهازي العصبي اليومين دول

فاكرين أغنية حاسس بمصيبة جايلي...يا لطيف يا لطيف

هذا هو شعوري بالضبط حالة من القلق والترقب بلا سبب عارفة عندي ضغط عصبي من الحاجات الي ورايا ومش بنجز منها شيء لكن مش للدرجة دي يعني الدنيا مش هتبوظ لو لم أكمل عمليات التوظيب والتي هي أوحش حاجة في إجازة أي موظفة مواجهة ما تم تطنيشه طوال العام
مفتكرش التوظيب هو السبب في أني وقفت أصلي صلاة الضحى من غير ما أغطي شعري وفيييييييييين عبال ما خدت بالي ولا أظن كذلك أنها السبب في أني في كل صلاة بأنوي أصلي صلاة العشاء ومحدش يسألني اشمعنى العشاء مش بقولكم هناك لخبطة جامدة في السيستم وربنا يستر تعدي من غير فرمتة

محدش يزق سوف أحكي الكابوس لكن رجاء فسروه تفاسير حلوة ماشي مثل أن الجنة قريب لأن الرسول عليه الصلاة والسلام قال ان الرؤيا على جناح طائر إن عبرت وقعت فخلونا نتوقع حاجات حلوة
اثنين أنا ما اعرفهمش واحد أنا عملت معاه معروف واحد وسوس له عشان يسرقوني ولما شفت نظرتهم وبداية تحركهم نحوي خفت من الشر اللي في عنيهم وشهقت وصحيت
خير اللهم اجعله خيرعلى غير العادة أكتب والعصافير بتسلك حناجرها وبتقول يا هادي يا رزاق يا كريم

ساعة متأخرة

اخوتي المتلحوسين المشهورين بالمدونين

فيه حاجات بتحصل معايا بتطير أي دماغ بعملها
كنت في أمان الله سهرانة على ام ب سي 4 مش على نور المسهتنة مفيش مرارة للكلام ده لكن على فيلم وقبل ما أنام قلت أطمئن على إيميلي احتمال يكونوا مزنوقين في وزير أو حتى مدير عام والناس لبعضها طبعا ولا يأس مع الحياة ولا حياة مع حاجات كثير
بتصفح بريدي لقيت الصورة دي مبعوثة لي في ايميل مذيل ب انشر تؤجر... هتسألوني متضايقة ليه وجاية ابرطم في الفضاء في الساعة المتأخرة دي هقولكم عشان أنا من فضل الكريم متكلفتة من عندي ستاشر سنة محدش يضحك والله عديت على ستاشر دي بس زمان شوية يعني كده المهم إن مرسلة الايميل هي اللي مش محجبة
طب بذمتكم بتقولي انشر تؤجر وانا كل صحابي متكلفتات وكافين خيرنا وشرنا طب أبعتها لمين يعني عشان أكسب الأجر والثواب
مش بالذمة حاجة محتاجة ساعة سكينة عشان يعرف الواحد يتعامل بحكمة
قلت مفيش غيركم يا حبيابي يا حلوين ياللي دايما مستحملين وزي ما انتو عارفين أنا برضو بستحمل وعلى قلبي احلي من العسل
فعلا احترت هي الناس بتبعت ايميلات كده سبهللة...... اشمعنى أنا مش بعرف اسهلل كده أمور حياتي
أنا عارفة احتمال دماغي اتكتمت مع طول الحجاب زي الناس الحلوة الي بتسألنا أنتو مش بتحروا من اللي انتو لابسينه
وحد زمان كان قالي أن دماغي حلوة لولا القيود الفكرية الي فارضها علي المجتمع ربنا يسهله مرتضيتش اقوله على زمني كان الحجاب بالخناق لبسته طاعة ومحبة لله وتقربا إليه ودعيت قبل ما أفعل بألا يردني الله واديتها خناقة مع والدتي كانت خايفة علي أعنس

الله يرحمها قلب المؤمن دليله عامة تعددت الأسباب والعنوسة واحدة

:)
مش عارفة ليه الحجاب تاعب الناس مع أنه عامل لنا هوية وقيمة وفين ما نروح يقولوا علينا مسلمين ومعرفش لو شهادة غير المسلمين تنفع في ميزانا لكن المهم اننا معروفين

وخلع الحجاب لن ينسينا ثوابت ديننا بدليل الي مش محجبة على يدكم باعتة تقولك ادعو للحجاب
نفسي حد يقول للبنات الي لابسة جينزات رش أصلها مش ممكن تتلبس بأي حال وملزقة البادي فيها تقولش جلدها الآخر وحاطة على شعرها بتاعة قد كده ولون الله لا يوريكوا ولا ما انتو بتشوفوا في الشوارع والأرصفة ومترو الأنفاق اشمعنى هو يعني وتقولك أنا محجبة يا اختي ارحمينا واعدلي نفسك وأحسني عملك انت كده بس بتوفري ثمن صبغة شعرك وشامبو القمل والكوافير لأن مفيش من الي انت عاملة ده أي صفة من صفات الحجاب ومعدش الواحد عارف يعمل إيه يدعو للحجاب ولا يعدل الحجاب الي حاله مايل هو كمان

ولا المزغودة الثانية اللي تقولها لمي شعرك ورقبتك تقولك كل شي بيتزبط بالتدرج ويعني هي الحتة دي الي عاملة سكس بنس

والأمثلة كثيرة المهتم بالموضوع ممكن يراجعني
انا كنت في حالي بس الإيميل نرفزني ابعت أقولها قولي لنفسك يا سونيا

؟؟؟
يا رب أسالك قبول العمل و حسن الخاتمة أحسن انتو عارفين

ساعة ساخرة

هناك مقولة تنسب لبرنارد شو " تعرف أنك عاشق حين تعمل ضد مصلحتك الشخصية"
إن كنت عاشق فأنت معذور بألا تتدبر عواقب الأمور وفي النهاية سعادة المحبوب تكفيك
الكارثة أن تعمل ضد مصلحتك الشخصية وأنت في كامل وعيك
ادعيلي
حاضر
ادعيلي من قلبك
حاضر
الظاهر أنك غير متحمسة
دعيت والله دعيت ولو أقدر كنت كنست السيدة وقطعت النذور
أول مرة سمعت فيها المثل " لا تدعي لصاحبك بالسعادة تخسره" قلت عليه مثل لئيم وحاقد
وتخسره حسب المعجم الوسيط تفقده وليس تبوظه لكن الأيام كانت أكثر لؤما من المثل واحتمال أنا الي كنت عبيطة وفيه مشروع للإجازة الصيفية للالتحاق بورشة متخصصة في اللؤم اللي بالي بالك ويريح حالك
عامة وبما أن الورشة لم تبدأ بعد مفيش مانع أن يكون هذا الدعاء الأخير الذي أطلقه بغض النظر عن تأثيره علي
رضينا بما يرضى الله...... اللهم حقق آمالنا..... وأصلح أحوالنا.....آمين
للحديث بقية.......