ساعة لؤم

مش هطول عليكم وهأقول ليه سميتها ساعة لئيمة

شايفين طبعا الصورة وكم الفرح اللي فيها

تقوم صاحبتي الأنتيم أيوه أنتو فاكريينها أي نعم بتاعة الشات أصل أصاحبي للأسف عشان مزاجي اللي انتو برضو عارفينه

مش كثار

صاحبتي المثابرة والمأجورة إن شاء الله على صبرها علي وعلى كآبتي بعتت الصورة دي كمحاولة أنتقامية والله أعلم من آخر جرعة كآبة أديتها لها في الوريد

باعتت الصورة بعنوان أنها تمطر ففتحتها ببراءة أي نعم كئيبة لكن مش لئيمة قوم لقيت الصورة دي مع تعليق كالسم الهاري المدسوس في العسل الأسود

منذ متى لم نعش هذا الشعور

:(((

عععععععععععععععععع أأأأاااااااااااااااااه عععععععععععععععععع

فاصل عياط وتقويق مناسب للسؤال

طب ليه؟ ما الطيب أحسن!!!مش عارفة هي قصدها من متى لم نفرح طبعا أنا وهي ولا استعبط وأفتكر من متى لم نشعر بالبلل

:)

إن كان على البلل فربنا عافانا من سنين كثير وقبل البامبرز بكثير وبارك في أمهاتنا على ما تحملن من مشقة حتى وصلنا مرحلة النشفان اللي سيادتك معترضة عليها

أما إن كنت تقصدين الفرح والنشوة والضحكة من الأعماق والشعور بالإنجاز إلى حد الاستهبال والمشي تحت المطر

؟؟؟؟

أفتكر عمري ما كنت هذا الرجل

مش بس عشان هو أشقر لا عشان أنا إنسانة كئيبة بليت ومش عارفة هو ابتلاء رباني ولا من التربية بطموح عالية كل ما أوصل لحتة أقول اف يا ربي زهقت ومش كفاية

مع ذلك من باب الشكر واللهم أعنا على شكرك وذكرك وحسن عبادتك كان لي في حياتي وقفات مع الفرح

أفتكر يوم تخرجي كان المفروض أفرح جدا هكذا ولكني لم افعل ولكنها كانت فرحة على قدي

ويوم استلامي لعملي الحلم أيضا كانت وقفة مع الفرح لكن أيضا للأسف لم افرح هكذا

ولا تكتفي أنتيمتي بسؤال كئيب ولكن تغرسه في مناسبة سعيدة كرأس السنة الهجرية

عرفتو بقى ليه ساعة لؤم !!!سؤالها شاتني بعيد في بحر الظلمات

حزنت لأني فاتني أن أفرح هكذا

أصحابي البلوجرية من خبرتي الحياتية هو غالبا فرحان على حاجة يملكها معظمنا ولكنها لا تدخل السرور إلى قلوبنا مثله ليس لأنها أتت رخاءا ولكن لأنا نسينا كيف نفرح

إذن هيا بنا نفرح بتذكر لحظات الفرح في حياتنا ونلملم الأجزاء المبعثرة لنرسم بها صورة جميلة لحياتنا

كل عام وأنتم إلى الله أقرب