ساعة متأخرة

اخوتي المتلحوسين المشهورين بالمدونين

فيه حاجات بتحصل معايا بتطير أي دماغ بعملها
كنت في أمان الله سهرانة على ام ب سي 4 مش على نور المسهتنة مفيش مرارة للكلام ده لكن على فيلم وقبل ما أنام قلت أطمئن على إيميلي احتمال يكونوا مزنوقين في وزير أو حتى مدير عام والناس لبعضها طبعا ولا يأس مع الحياة ولا حياة مع حاجات كثير
بتصفح بريدي لقيت الصورة دي مبعوثة لي في ايميل مذيل ب انشر تؤجر... هتسألوني متضايقة ليه وجاية ابرطم في الفضاء في الساعة المتأخرة دي هقولكم عشان أنا من فضل الكريم متكلفتة من عندي ستاشر سنة محدش يضحك والله عديت على ستاشر دي بس زمان شوية يعني كده المهم إن مرسلة الايميل هي اللي مش محجبة
طب بذمتكم بتقولي انشر تؤجر وانا كل صحابي متكلفتات وكافين خيرنا وشرنا طب أبعتها لمين يعني عشان أكسب الأجر والثواب
مش بالذمة حاجة محتاجة ساعة سكينة عشان يعرف الواحد يتعامل بحكمة
قلت مفيش غيركم يا حبيابي يا حلوين ياللي دايما مستحملين وزي ما انتو عارفين أنا برضو بستحمل وعلى قلبي احلي من العسل
فعلا احترت هي الناس بتبعت ايميلات كده سبهللة...... اشمعنى أنا مش بعرف اسهلل كده أمور حياتي
أنا عارفة احتمال دماغي اتكتمت مع طول الحجاب زي الناس الحلوة الي بتسألنا أنتو مش بتحروا من اللي انتو لابسينه
وحد زمان كان قالي أن دماغي حلوة لولا القيود الفكرية الي فارضها علي المجتمع ربنا يسهله مرتضيتش اقوله على زمني كان الحجاب بالخناق لبسته طاعة ومحبة لله وتقربا إليه ودعيت قبل ما أفعل بألا يردني الله واديتها خناقة مع والدتي كانت خايفة علي أعنس

الله يرحمها قلب المؤمن دليله عامة تعددت الأسباب والعنوسة واحدة

:)
مش عارفة ليه الحجاب تاعب الناس مع أنه عامل لنا هوية وقيمة وفين ما نروح يقولوا علينا مسلمين ومعرفش لو شهادة غير المسلمين تنفع في ميزانا لكن المهم اننا معروفين

وخلع الحجاب لن ينسينا ثوابت ديننا بدليل الي مش محجبة على يدكم باعتة تقولك ادعو للحجاب
نفسي حد يقول للبنات الي لابسة جينزات رش أصلها مش ممكن تتلبس بأي حال وملزقة البادي فيها تقولش جلدها الآخر وحاطة على شعرها بتاعة قد كده ولون الله لا يوريكوا ولا ما انتو بتشوفوا في الشوارع والأرصفة ومترو الأنفاق اشمعنى هو يعني وتقولك أنا محجبة يا اختي ارحمينا واعدلي نفسك وأحسني عملك انت كده بس بتوفري ثمن صبغة شعرك وشامبو القمل والكوافير لأن مفيش من الي انت عاملة ده أي صفة من صفات الحجاب ومعدش الواحد عارف يعمل إيه يدعو للحجاب ولا يعدل الحجاب الي حاله مايل هو كمان

ولا المزغودة الثانية اللي تقولها لمي شعرك ورقبتك تقولك كل شي بيتزبط بالتدرج ويعني هي الحتة دي الي عاملة سكس بنس

والأمثلة كثيرة المهتم بالموضوع ممكن يراجعني
انا كنت في حالي بس الإيميل نرفزني ابعت أقولها قولي لنفسك يا سونيا

؟؟؟
يا رب أسالك قبول العمل و حسن الخاتمة أحسن انتو عارفين

ساعة ساخرة

هناك مقولة تنسب لبرنارد شو " تعرف أنك عاشق حين تعمل ضد مصلحتك الشخصية"
إن كنت عاشق فأنت معذور بألا تتدبر عواقب الأمور وفي النهاية سعادة المحبوب تكفيك
الكارثة أن تعمل ضد مصلحتك الشخصية وأنت في كامل وعيك
ادعيلي
حاضر
ادعيلي من قلبك
حاضر
الظاهر أنك غير متحمسة
دعيت والله دعيت ولو أقدر كنت كنست السيدة وقطعت النذور
أول مرة سمعت فيها المثل " لا تدعي لصاحبك بالسعادة تخسره" قلت عليه مثل لئيم وحاقد
وتخسره حسب المعجم الوسيط تفقده وليس تبوظه لكن الأيام كانت أكثر لؤما من المثل واحتمال أنا الي كنت عبيطة وفيه مشروع للإجازة الصيفية للالتحاق بورشة متخصصة في اللؤم اللي بالي بالك ويريح حالك
عامة وبما أن الورشة لم تبدأ بعد مفيش مانع أن يكون هذا الدعاء الأخير الذي أطلقه بغض النظر عن تأثيره علي
رضينا بما يرضى الله...... اللهم حقق آمالنا..... وأصلح أحوالنا.....آمين
للحديث بقية.......

ساعة طرق الحديد

علاقة الصورة بالعنوان قد لا تكون واضحة إلا إن كانت حياتك شبه حياتي هتفهمني على طول

باختصار ومن الآخر أنا واخدة على دماغي حديثا آآآآآآآآه يا دماغي ومتلحوسة وعمالة أسلخ الاكتئاب عني بالقوة ولشدة التصاقه لما بشده بالقوي بياخد معه حتت مني وبتفضل حتت منه لازقة معايا العمر كله

لتشكيل الحديد لا بد من صهره والصهر يكون من خلال درجات عالية من الحرارة والنار يعني على رأي هيفا وهبي وااااوااااا ومش بس كده عشان يبقى شكلنا مقبول تبدأ عمليات التشكيل من خلال الطرق وخلال الطرق تزداد صلابة الحديد

ولهذا كانت عبارة طرق الحديد تزيده صلابة شعاري في مراحل حياتي في التعامل مع الفشل ولما من كام يوم جمعت الفشل فشلات قالوا لغويا ممكن

وأعمل إيه مش عارفة لسه الدنيا والناس مش راضية عن شكلي ولا عن حالي وتستمر حالات الطرق والصك على دماغي ليس كراهة حاشا لله ولكن تحسينا لحالي وأبقى حلوة ومفيدة زي كده

عشان نقاوم الاكتئاب نتذكر معا وصية الرسول عليه الصلاة والسلام لأم سلمة لما ذهب معزيا في زوجها وأمرها بأن تقول لا حول ولا قوة إلا بالله اللهم أجرني في مصيبتي واخلفني خيرا منها

واللي مش عارفين قصة الدعاء نكمل لهم بأن أم سلمة استهجنت وقالت سبحان الله من أفضل من أبو سلمة سيبوني في حالي وهمي ولكن الرسول عليه الصلاة والسلام أصر وبعد ذلك أصبحت واحدة من زوجات الرسول عليه الصلاة والسلام وأمهات المؤمنين يعني في النهاية وفاة أبو سلمة كانت خير عليها

اللهم أجرني في مصيبتي واخلفني خيرا منهاا

آآآآآآآآه يا دماغي

ساعة اغتراب

أبيه أدلر(واحد بتاع علم نفس تحليلي) بيقول أن الإنسان مدفوع للحركة بسبب شعوره بالاغتراب

أصل البني آدم مننا –والكلام مش بتاعي- بيكون عايش في هناء وجنة ونعيم في القرار المكين واكل شارب مش محتاج مواصلات ولا عليه فواتير مربع على قلب أمه ومهيص على حركتها في الحياة ببلاش سفلقة....... قوم ساعة ما يتزنق في الولادة......يحاول يفلفص من الأيادي المدودة قال إيه بستقبله في الحياة السعيدة يبدأ هو الصويت على فقدان النعيم اللي كان عايش فيه ويفضل طول عمره يبحث عما يشعره مرة أخرى بتلك السعادة الأزلية الكاملة

وتدور به عجلة الحياة وما يعرفش هترسي على فين لكن تبقى الحاجة للانتماء والشعور بذاك الدفء والحنان مرة أخرى سياط تقود خطاه العمر كله
حد منا يا ترى رست مراكبه في مرفأ خفف من شعوره بالاغتراب
كلنا أذان صاغية.......... قصدي عيون مشتاقة

ساعة تناقض

طالعة السلالم يا ما شاء الله عليها
ضحكتم؟ لسه عشان خاطري ابتسموا على الأقل
الصورة أنعشتني في لحظة سوداء لما فكرتني بالأغنية
رغم أن الغيوم المحيطة بنهاية الصورة تشير إلى السماء وكلنا عارفين أن الصعود إلى السماء كناية عن الموت
لكن أنا شفت فيها وصول للأحلام عشان بحب الغيوم
وبأي حال سواء كانت وصول للمحبوب أو صعود للسماء كلها حركة والحركة طبعا زي ما كلكم عارفين حبايبي يا حلوين فيها بركة
الحالتان تمثلان إنعتاق نوعا ما ومش مهم من إيه من الوحدة من الكآبة ولا حتى من الحياة
واحد واحد يا حلوين يلا بينا وكل حي يروح مطرح ما هو عايز بس قبل ما يغير عنوانه كل واحد من أصدقائي يقولنا رايح على فين مش فضول لا قدر الله بس عشان قضايا تحويل البريد وبير السبع لو سألت عليه
عن نفسي حاليا مكتفية بالوقوف أسفل الدرج منشغلة بالتفكير أروح فين

ساعة امتحان

في صغري كنت أكره الامتحانات السهلة!!! آه والله وأخرج منها ضائقة الصدر كارهة للمتحنة
زمان وليس الآن فبعد النضج واللحوسة في أعتاب الحياة عرفت أن الله حق وتعلمت أن أفرح بالامتحانات السهلة
لكن لعنة الامتحانات الصعبة أصبحت تطاردني وتحاصرني وأتمنى وصفة للفكاك منها ينوبكم ثواب
آخر امتحان تعرضت له أول مبارح إحدى الطالبات جاءتني تشكو ...يا ليتها اشتكت من الدرجات.....ولا من كثرة الواجبات....جاءت تشكو تحرش أحد الإداريين بها!!!! لماذا اختارتني محدش يسألني أنا أصلا مش مدرستها لكن هو نصيبي من الامتحانات الصعبة!!!! رجل متزوج وأب ماذا يريد من حائرة بين الطفولة والشباب؟؟ أكذب إن قلت أني أحبه ولكني نادرا ما أحب ولكني أجد صعوبة في التصديق.... ولا استطيع تكذيبها تماما لأن الشيطان تبرئ من شرور إنسان هذا الزمان وتحول إلى تلميذ صغير في فصوله
ماذا أفعل؟؟؟ لا أستطيع السكوت وكأني لم أسمع...... ماذا أفعل في الساعة دي

يا ريت لحظة معه

عليه أفضل الصلاة والسلام
أتمنى لحظة معه لا ساعة ولأن الطمع مكروه إلا في الدين فيا رب ارزقنا سنته في الدنيا وجواره في الآخرة
طبعا عادي أكون آخر من يعلم بأي جديد ورغم تكرر الحالة إلا أني لا أتوقف عن العتب واللوم لماذا أكون آخر من يعلم بمثل موقع الرسول عليه الصلاة والسلام
بارك الله في القائيمن عليه ورزقنا الانتفاع به