ساعة جديدة

أنا فرحانة وهأطير من الفرحة....لا استنوا مش الي خطر على بالكم خالص أنما الحمد لله بقيت زي الناس المهمة والحساسة اللي بتعاني من الكوابيس أي نعم أنا حلمت حلم مزعج شهقت ومن ساعتها وأنا صحاية ومش جايلي نوم أول مرة تحصل معايا الحكاية دي

العادي أن نومي قليل والعادي أني معرفش أنام أو أنام متأخر ولرداءة نوعية نومي من النادر أني أحلم فما بالك أحلم ويكون كابوس مش بقولكم جديدة
شكلكم عايزين تعرفوا تفاصيل الكابوس هو كان مختصر ما أنا قولت أن نومي قليل يعني الطبيعي يكون الكابوس مختصر
خطر على بالي أزودكم بعنواني لو كان فيه ضرورة لتفسير الكابوس على أي قناة من قنوات تفسير الأحلام للحصول على بعض الدعم المادي أدام صعب حد يناولني كباية مية ويسمي عليا
شاغلني أكثر من التفسير سبب حالة الاستنفار لجهازي العصبي اليومين دول

فاكرين أغنية حاسس بمصيبة جايلي...يا لطيف يا لطيف

هذا هو شعوري بالضبط حالة من القلق والترقب بلا سبب عارفة عندي ضغط عصبي من الحاجات الي ورايا ومش بنجز منها شيء لكن مش للدرجة دي يعني الدنيا مش هتبوظ لو لم أكمل عمليات التوظيب والتي هي أوحش حاجة في إجازة أي موظفة مواجهة ما تم تطنيشه طوال العام
مفتكرش التوظيب هو السبب في أني وقفت أصلي صلاة الضحى من غير ما أغطي شعري وفيييييييييين عبال ما خدت بالي ولا أظن كذلك أنها السبب في أني في كل صلاة بأنوي أصلي صلاة العشاء ومحدش يسألني اشمعنى العشاء مش بقولكم هناك لخبطة جامدة في السيستم وربنا يستر تعدي من غير فرمتة

محدش يزق سوف أحكي الكابوس لكن رجاء فسروه تفاسير حلوة ماشي مثل أن الجنة قريب لأن الرسول عليه الصلاة والسلام قال ان الرؤيا على جناح طائر إن عبرت وقعت فخلونا نتوقع حاجات حلوة
اثنين أنا ما اعرفهمش واحد أنا عملت معاه معروف واحد وسوس له عشان يسرقوني ولما شفت نظرتهم وبداية تحركهم نحوي خفت من الشر اللي في عنيهم وشهقت وصحيت
خير اللهم اجعله خيرعلى غير العادة أكتب والعصافير بتسلك حناجرها وبتقول يا هادي يا رزاق يا كريم